Update/Hetimet për audio-përgjimin e pagëzuar si “Babalja” kanë sjellë në dyert e Prokurorisë së Krimeve të Rënda edhe Drejtorin e Përgjithshëm të Policisë së Shtetit, Ardi Veliun.
Ky i fundit është paraqitur në prokurori rreth orës 13:00 për t’u marrë në pyetje nga prokurorët dhe ka dalë nga aty rreth orës 14:00.
Kreu i Policisë së Shtetit është përmendur nga Fredi Alizoti në një video të publikuar nga PD-ja, se e kishte shoqëruar Alizotin për t’u marrë në pyetje në Prokurorinë e Krimeve të Rënda dhe se kishte ndikuar tek Alizoti që të pohonte se audio-përgjimi i Albert Veliut nuk është bërë me vëllanë e ministrit të Brendshëm, por me Fredi Alizotin që kishte imituar Agron Xhafën.
Ndonëse Policia e Shtetit në një reagim pas videos deklaroi se drejtori Ardi Veliu në ditën kur Alizoti ishte pyetur në prokurori ishte në një tjetër angazhim zyrtar, prokurorët e çështjes “Babale” vendosën ta pyesin zyrtarisht kreun e policisë shqiptare.
Ardi Veliu në Prokurori, si kunati i “Babales” e futi në kurth
Sot në orën 13:00 do të dëshmojë në prokurorinë e Krimeve të Rënda drejtori i Policisë së Shtetit Ardi Veliu. Emri i tij është i lakmuar në videon e kunatit të “Babales”. Ndërsa nesër në orën 09:30 do dëshmojë ish-drejtori i Policisë Bashkiake, Florenc Hoxha. Veliu sot dhe Hoxha nesër do të pyeten nga prokurorët Gentjan Osmani dhe Përparim Kulluri.
Videoja e dytë e publikuar pak ditë më parë nga deputeti i PD-së, Ervin Salianji për dosjen “Babale”. Aty përfshihet edhe audio- përgjimi që sipas ekspertizës rezultoi i rremë. Në videon e dytë Alizoti pretendon se është marrë në makinë nga drejtori i Përgjithshëm i Policisë së Shtetit, Ardi Veliu. Ai është marrë me qëllimin për të dhënë në Prokurori dëshmi të rreme lidhur me çështjen “Babale”.
Gjithashtu, ai pretendon se është takuar edhe nga kryetari i grupit parlamentar socialist, Taulant Balla. Ky i fundit , sipas tij i ka premtuar para për të ndryshuar versionin e ngjarjes. Por, si Policia e Shtetit ashtu edhe deputeti socialist, Taulant Balla, mohojnë akuzat e Fredi Alizotit. Ndërkohë që Florenc Hoxha do të merret në pyetje, pasi është personi që ka intervistuar kunatit e “Babales”.
