Ministrja e Kulturës, Mirela Kumbaro ka qenë e ftuar mbrëmjen e djeshme në Top Channel në emisionin Top Show ku dhe është përballur me artistët e Teatrit Kombëtar.
E vënë përballë Arben Derhemit, Altin Bashës, Gec Fugës, Gëzim Kames, dhe Robert Budinës misnistrja Kumbaro tha se janë rikonstruksionet ato që po na shtyjnë të bëjmë lëvizje të tilla, pasi në atë godinë ku jeni nuk ia vlen të bëhen rregullime pasi godina është shumë e vjetër dhe kushtet lenë shumë për të dëshiruar.
“Raportet e inspektimeve që kemi bërë në Teatrin Kombëtar na çuan në konkluzionin se nuk ia vlen që në atë godinë të shpenzohet asnjë para për rikonstruksionin, sepse është një godinë shumë e vjetër, e ndërtuar për një periudhë të shkurtët kohore. Prandaj, vendosëm që në atë ambient të ndërtohet një sallë e re teatri, moderne dhe bashkëkohore, në të njëjtin vend ku është aktuali. Unë nuk kam dëgjuar asnjë histori kulle dhe nuk di nga kanë dalë këto histori. Pra, është diskutuar që qeveria dhe Bashkia e Tiranës, të parashikojnë në të njëjtin truall ku ndodhet sot Teatri Kombëtar, të ndërtohet një teatër i ri. Nuk ka ende një projekt dhe një afat konkret për ta bërë këtë, sepse jemi ende në diskutime dhe studime. Unë ju garantoj se ambienti i Teatrit Kombëtar do të jetë Teatër Kombëtar, pa kulla”- shtoi Ministrja e Kulturës.
Por Arben Derhemi ka reaguar ashpër duke thënë se: “Trupa e artistëve nuk do të lejojë zhvendosjen e Teatrit Kombëtar. Ne do të dalim nga aty vetëm kur ju të kaloni mbi trupat tanë të vdekur”.
