Pas deklaratës së pedagoges Iris Luarasi, e cila tha se 4 gazetarë të cilët sot janë të suksesshëm, ajo i ka ngelur në klasë kur kanë qenë studentë, kanë ardhur edhe reagimet e para.
Pedagogu dhe eksperti i ekonomisë, Ilir Ciko, nuk e ka pritur fare mirë këtë gjë, duke mos qenë fare dakord me përmendjen e emrave të tyre në publik.
Sipas tij, me përmendjen e emrave të gazetarëve, Iris Luarasi ka cenuar privatësinë e tyre, teksa shton se duhen vendosur rregulla të reja loje për të mos e lejuar më këtë gjë.
Iris Luarasi ishte e ftuar të shtunën në emisionin “Shiko kush luan” në Top Channel, ku gjatë një loje iu kërkua të përmendte 4 emra personazhesh, të cilët i ka pasur studentë por që kanë mbetur në lëndën e saj.
Luarasi u përgjigj pa hezitim duke përmendur emrat e: Arbana Osmanit, Jonida Shehut, Erl Murati dhe Artan Hasani.
“Në fakt do ju them katër emra të cilët tani i kam shumë miq por në kohën kur ishin studentë kanë mbetur në klasë. Janë: Arbana Osmani, Jonida Shehu, Erl Murati dhe Artan Hasani”, u shpreh ajo.
Postimi i plotë i Cikos:
Nuk e kam kuptuar asnjëherë se si një person që e quan veten pedagog mund të bëjë publike, madje me krenari dhe në emisione televizive, emra personash që i ka ngelur në lëndën e tij/saj, aq më tepër kur këta janë po aq, a në mos edhe më të njohur për publikun.
Kam 16 vite që kam përcjellë breza studentësh e në ato raste kur kam qenë i shtrënguar për të mos i kaluar, jam i sigurt që askush tjetër veç studentit dhe administratës së universitetit nuk është informuar për vlerësimin përkatës.
Nëse normat e etikës është vështirë të funksionojnë, besoj se duhen vendosur rregulla loje për të mos cënuar pa të drejtë privatësinë e të tjerëve.
