Arabia Saudite ka përjashtuar normalizimin e marrëdhënieve me Izraelin, përpara përfundimit të një marrëveshjeje paqeje mes Izraelit dhe Autoritetit Palestinez.
Në deklaratën e parë zyrtare lidhur me këtë marrëveshje, kryediplomati saudit Faisal ben Farhane tha se: “Është e domosdoshme të arrihet një paqe midis palestinezëve dhe izraelitëve, në bazë të marrëveshjeve dhe rezolutave ndërkombëtare, përpara normalizimit të marrëdhënieve midis Riadit dhe shtetit hebre. Sapo të ndodhë kjo, gjithçka do të jetë e mundur”.
Kujtojmë se në vitin 2002, Arabia Saudite ndërmori iniciativën e një plani arab për paqen, i cili parashikon kthimin e Izraelit në kufijtë e vitit 1967 dhe krijimin e një shteti palestinez, kundër njohjes së shtetit hebre nga vendet arabe.
