Në pamundësi për të qenë një yll Hollywood-i, ajo që mund të të lejohet është të fantazosh, apo jo? ‘Zao’ është aplikacioni më i fundit kinez që është bërë viral, pasi të krijon mundësinë që nëpërmjet ngarkimit të një fotoje tënden, të shohësh veten në rolin e Leonardo di Caprio, apo të Marilyn Monroe, përpos personazheve kinezë me famë.
Në fakt, është aplikacioni që e bën të duket kaq reale, saqë ka bërë ‘namin’ duke u shkarkuar nga miliona njerëz që nga dita e premte, 30 gusht, ditën që ‘Zao’ u lançua për herë të parë. Mirëpo, përpos zbavitjes, duket se aplikacioni ka krijuar një sërë polemikash për shkak të politikave të privatësisë.
Ndërsa aplikacioni u bë viral, një numër i konsiderueshëm përdoruesish u ankuan se ky aplikacion mund t’ju rrezikojë privatësinë atyre. Një pjesë e marrëveshjes së përdoruesit deklaron që konsumatorët autorizojnë imazhet e tyre në ‘Zao’ të përdoret për qëllime marketingu.
“Ne e kuptojmë plotësisht ankthin që njerëzit kanë ndaj shqetësimeve për cenimin e intimitetit. Kemi marrë pyetjet që ju na keni dërguar. Do të korrigjojmë fushat që nuk kemi marrë parasysh në fillim dhe për ta bërë këtë, kërkojmë pak kohë kohë”, tha kompania për mediat.
Ky nuk është aplikacioni i parë që krijon shqetësime mbi privatësinë e përdoruesve. Rreth një muaj më parë, ‘FaceApp’, me të njëjtin intensitet që krijoi ‘zhurmë’ në rrjetet sociale, me të njëjtin intensitet krijoi ‘zhurmë’ në media mbi cenimin e privatësisë.
Megjithatë, në vetvete jo vetëm ‘ aplikacionet e fytyrave’ krijojnë polemika dhe debat, pasi risku qëndron në çdo aplikacion pas së cilit qëndrojnë servera përgjatë gjithë kohës. Facebook, përshembull, prej vitesh ka krijuar debate të mëdha lidhur me përdorimin e të dhënave të përdoruesve të vet, e nëse një gjigand si Facebook mundet, a duhet të presim nga aplikacionet e tjera mos ta bëjnë?
Jenida Vladi/ SCAN
