Klodiana Shala dhe Luiza Gega padyshim janë atletet më të suksesshme shqiptare. Të dyja ishin të ftuara në emisionin “Pasdite në Top Channel”, ku ndër të tjera rrëfyen miqësinë dhjetë vjeçare, sakrificat, punën, përpjekjet për të arritur medaljet.
Luiza tregoi se e ka pasur idhull që në fillimet e karrierës Klodianën dhe se sa e ka ndihmuar ajo për tu bërë profesioniste. Dy miket rekordmene tregojnë problemet që kanë hasur, reagimin e autoriteteve, rastet kur janë ndjerë krenare për njëra-tjetrën dhe sa e vështirë është të mbijetosh në këto kushte në Shqipëri, kur ofertat nga jashtë janë të majme dhe joshëse.
Në fund të intervistës, Klodiana Shala dha edhe një mesazh, duke i bërë thirrje sportistëve shqiptarë që të largohen jashtë vendit. “Sportistët profesionistë të ikin sa më parë nga Shqipëria për t’u stërvitur jashtë. Ne nuk duhet t’i shajmë ata, sepse bëjnë sakrifica dhe duhet të shkojnë në vendet ku e meritojnë”, tha Klodiana Shala.
