Kryedemokrati Lulzim Basha ka marrë fjalën në podiumin e ngritur para godinës së Kryeministrisë. Në nisje të fjalës së tij, Basha përmendi anulimin e zgjedhjeve më 30 qershor, vendim ky i ardhur së fundmi nga presidenti Meta.
Këtë vendim, Basha e cilësoi si një arritje falë qëndrimit dhe rezistencës së qytetarëve të shumtë, ndërsa shtoi se kjo fitore nuk është fundi i betejës.
Fjala e Bashës në protestën e opozitës së bashkuar:
Javën e kaluar thashë se nuk do e merrja fjalën. Por, për shkak të zhvillimeve dua të flas para jush për anulimin e procesit kriminal të 30 qershorit nga presidenti Meta.
Kjo është vetëm rezultat i forcës tuaj, i qëndresës tuaj, i besimit tuaj të palëkundur te vlerat evropiane të lirisë, demokracisë, të dinjitetit njerëzor. Ishte ky bashkim që diktoi anulimin e 30 qershorit dhe juntës kriminale! Është forca e drejtësisë së kauzës sonë ajo që dikton këto vendime! Vëllezër dhe motra le ta themi këtu të gjithë së bashku, vendosmërinë tonë për ta çuar këtë betejë deri në fund, deri në fitore, Rama ik! Sot e gjithë bota e di që në Shqipëri sundon një qeveri e zgjedhur nga mafia dhe jo nga populli. Këto fakte tronditëse i kanë hapur sytë çdo shqiptari, asaj pakice skeptike dhe i ka bërë të marshojë në mënyrën më mahnitëse në këtë shesh të lirisë, demokracisë dhe ndryshimit që po vjen për çdo shqiptar.
Anulimi i procesit kriminal të 30 qershorit, nuk është fundi i betejës sonë. Është rezultati i qëndrimit tuaj. Ju bëj thirrje, zemërimi juaj është i ligjshëm por ka vetëm një njeri që lutet për dhunë dhe ky është njeriu që nuk do i shpëtojë gjykimit të popullit, ky është Edi Rama. Mos cenoni asnjë efektiv të policisë me uniformë, vëllezërit dhe motrat tona që do rreshtohen në krahun tonë për ta çliruar Shqipërinë nga krimi./ Tirana Today
