Egjipti lëshoi Ever Given, një anije të madhe kontejnerësh që pati bllokuar Kanalin e Suezit në fillim të këtij viti pasi autoritetet e rrugës ujore dhe pronarët japonezë të anijes arritën një marrëveshje mes tyre. Lirimi i anijes së transportit i jep fund një ngërçi që zgjati më shumë se tre muaj pasi anija ishte bllokuar në bazë të një pretendimi të ngritur nga Autoriteti i Kanalit të Suezit (SCA).
Anija me flamur panamez u zhvendos më 29 mars, gjashtë ditë pasi u anua gjatë një stuhie rëre dhe bllokoi kanalin, duke prishur trafikun në një nga rrugët më të ngarkuara të transportit dhe duke shkaktuar efekt zinxhir në të gjithë botën.
Anija me gjatësi 400 metra, më vonë u ankorua në zonën e Liqeneve të Mëdha, një pjesë më e madhe e kanalit. Të Mërkurën, përfaqësuesit ligjorë të SCA-së dhe pronarët e anijes nënshkruan një marrëveshje të pazbuluar kompensimi.
Pas nënshkrimit të marrëveshjes, Ever Given u pa duke lundruar nga Kanali Suez. Media egjiptiane raportoi se ajo do të shkonte në Roterdam, Holandë. Pamjet e drejtpërdrejta nga stacionet televizive egjiptiane treguan se anija me flamur Panamez po largohej ndërsa një grup udhëzuesish me uniformë valëvisnin flamurin Egjiptian.
SCA fillimisht kërkoi 950 milion dollarë kompensim, para se të ulte kërkesën në 550 milion dollarë, sipas mediave egjiptiane. Të martën, një gjykatë egjiptiane lëshoi një urdhër që lejon lirimin e Ever Given. Kanali i Suezit, i cili lidh Mesdheun me Detin e Kuq, është një nga burimet kryesore të të ardhurave të Egjiptit, së bashku me turizmin dhe dërgesat e emigrantëve. /Tirana Today
