Matias Morla, ka qenë avokati i Diego Armando Maradona-s në vitet e fundit të jetës së tij. Një figurë shumë e rëndësishme për legjendën, i cili ka bërë një akuzë shumë të fortë këtë të enjte me një postim në rrjetet sociale.
“Sot është një ditë shumë e dhimbshme dhe e trishtë. Ndjej në zemër largimin e mikut tim, që e kam nderuar me ndershmërinë dhe mbështetjen time deri në ditën e fundit”, ka shkruar Morla.
Sipas tij, ambulancës i është dashur më shumë se gjysmë ore për të ardhur te shtëpia e Maradonës.
“Për sa i takon raportit të Prokurorisë së San Isidros, është e pashpjegueshme që për 12 orë miku im nuk ka marrë asnjë kujdes dhe asnjë kontroll nga personeli shëndetësor. Ambulancës i është dashur më shumë se gjysmë ore për të ardhur, ka qenë një idiotësi kriminale. Ky fakt nuk duhet anashkaluar dhe do të kërkoj që pasojat të hetohen deri në fund”. Siç më ka thënë Diego: je ushtari im, vepro pa mëshirë. U prehsh në paqe, vëlla”, përfundoi ai.
Diego Armando Maradona, ndërroi jetë ditën e djeshme, në moshën 60-vjeçare për shkak të arrestit kardiak.
Pak ditë më parë, ai i’u nënshtrua një operacioni në kokë, pasi kishte mpiksje gjaku në tru. Maradona po merrte veten pas ndërhyrjes kirurgjikale, por shëndeti i tij u përkeqësua.
Jeta dhe karriera e tij
Diego Maradona u lind në Lanus të Buenos Aires, në një familje të varfër si djali i vetëm pas katër motrave. U rrit profesionalisht në Argjentinë tek Argentina Juniors dhe më pas bëri kalimin tek Boca Juniors, aty ku tifozët e shohin si ‘Zot’.
Më pas në vitin e largët 1982, Maradona kaloi tek Barcelona, Napoli, Sevilla dhe për t’u rikthyer më pas për ta mbyllur sërish tek ekipi i zemrës, Boca Juniors.
Ai fitoi Kupën e Botës me kombëtaren në vitin 1982, ku mposhtën Gjermaninë me rezultatin 3-2.
Gjithashtu, ai shkëlqeu në arenën ndërkombëtare me Argjentinën që e drejtoi edhe si trajner.
Së fundmi, ai ishte trajner i Gimnasia de la Plata, ekipi i fundit me të cilin do të kishte të bënte. ”Djaloshi i artë” nuk do të jetë më mes futbolldashësve duke lënë një thesar të paçmuar në fushë dhe përtej. Shumë e konsiderojnë si futbollisti më i mirë i të gjitha kohërave, teksa vetë ai si pasardhës të tij e konsideronte Lionel Messi-n.
