“Njerëzit e pakënaqur duhet të jenë më kërkues ndaj qeveritarëve të tyre!”. Ky ka qenë mesazhi i ambasadores amerikane Yuri Kim dhënë në Pustec, teksa ishte e ftuar në ditët e “Mik festival” në Korçë që organizohet nën drejtimin e sopranos Inva Mula. Në një komunikim për mediat, Kim është shprehur se “reforma në drejtësi ka ecur përpara”. Ajo ka kërkuar që kjo reformë të mos ndalet. “Unë mendoj që reforma në drejtësi po çohet përpara, ngadalë, me ngadalë se çfarë do të donim por është padyshim një shtysë përpara, njerëzit duhet të vazhdojnë të jenë të pakënaqur, duhet të jenë më tepër kërkues me qeveritaret e tyre, njerëzit që ata kanë zgjedhur dhe duhet të vazhdojnë përpara. Tani është koha që të vazhdojmë përpara. Mos u dorëzoni. Disa njerëz thonë që reforma në drejtësi është asgjë, duhet të dorëzohemi, por jo, po ju gënjejnë, mos hiqni dorë”, ka thënë Kim.
Më pas, ambasadorja Kim, ka “hequr dorë” nga të qenurit “peshkatare” apo “gjyqtare” e atyre që konsiderohen si “kokat e mëdha të korrupsionit”. “Unë jam diplomate. Unë nuk jam një persekutore, nuk jam një peshkatare, nuk jam gjyqtare, unë jam thjesht një diplomate. Institucionet kanë përgjegjësinë e tyre, ata e dinë se cilat janë përgjegjësitë e tyre, unë mendoj që ata po nisin t’i përmbushin ato. Le të mbështesim ata. Ajo që dua të flas në fakt është kultura shqiptare, dhe mundësia e madhe për të qenë me MIK FESTIVAL dhe dëgjonim “Zanat”, nuk është vetëm reforma e drejtësisë, është bukuria e Shqipërisë dhe shpirti i shqiptarëve që me jep shpresë”, tha Kim nga Pusteci./Tirana Today
