Ambasadori spanjoll në Beograd, Miguel Fuertes Suares ka thënë se Spanja i është mirënjohëse Serbisë që nuk i dërgoi letër Komisionit Evropian, për qëndrimin e saj se rastet e Kosovës dhe Katalonjës nuk mund të krahasohen.
Këtë deklaratë ambasadori e bëri për numrin e sotëm të gazetës “Politika”.
“Spanja i është mirënjohëse Qeverisë së Serbisë që për momentin nuk e ka ngritur këtë çështje, siç edhe ka shpjeguar tashmë Presidenti Aleksandër Vuçiç”, tha ambasadori spanjoll, transmeton Klan Kosova.
Para pak ditësh Spanja i dërgoi një kërkesë Beogradit zyrtar, për anulimin e dërgimit të kësaj letre, e cila parashikohej se do të përkeqësonte situatën.
Në letër planifikohej që Serbia t’u bënte thirrje 22 anëtarëve të Bashkimit Evropian që të rishqyrtonin vendimin për njohjen e pavarësisë së Kosovës me arsyetimin se Katalonja është një shembull i qartë i këtij gabimi.
