Ambasadori i OSBE-së në Tiranë, Berdard Borchardt ka zhvilluar një takim me partitë e vogla. Ai u sugjeroi sot partive te vogla opozitare, “të mendojnë për një zgjidhje, dhe kjo zgjidhje duhet gjetur në Shqipëri”.
Deklarata është bërë gjatë takimit që Borchardt zhvilloi me krerët e partive, pas kërkesës së këtyre të fundit. Pyetur nëse mund të pranohet një shtyrje e zgjedhjeve, ambasadori flet prerë, teksa thotë se “Për momentin kemi një datë zgjedhjesh, 30 qershorin. Pikë. Ndryshimi i datës është një proces i ndërlikuar”.
Çfarë u sugjeruat partive politike në takim?
Të mendojnë për një zgjidhje, dhe kjo zgjidhje duhet gjetur në Shqipëri. Ka shumë mënyrë për të gjetur një zgjidhje, por u takon atyre dhe partive të tjera politike që të bien dakord për njërën prej tyre.
A keni ndonjë propozim konkret?
Kjo nuk na takon neve. Ne i nxitim partitë politike të ecin përpara, të gjejnë zgjidhje dhe ne jemi ata që mund të japin ekspertizë se cilat zgjidhje mund të funksionojnë dhe si mund të funksionojnë. Por se cila do të ishte zgjidhja e mirë për një vend… ky është një vendim sovran. Ne vetëm mund të këshillojmë për funksionimin e këtyre zgjidhjeve.
A është ide e mirë shtyrja e zgjedhjeve për t’u dhënë kohë partive të gjejnë kompromis?
Për momentin kemi një datë zgjedhjesh, 30 qershorin. Pikë. Ndryshimi i datës është një proces i ndërlikuar.
Ata ju thanë se diçka e tillë ka ndodhur me certifikatat në vitin 2007. Pse është e ndërlikuar këtë herë?
Sigurisht që shtyrja e zgjedhjeve ndodhi në 2007-n, por a është kjo një zgjidhje e mirë? Kjo është diçka që duhet ta vendosin aktorët politikë në vend. Pastaj, vetëm shtyrje? Çfarë do të ndryshonte kjo?
Çfarë roli mund të luajë Presidenti i Republikës së Shqipërisë?
Më vjen keq, por nuk mund të flas në emër të presidentit.
Partitë brenda në takim folën për rolin e presidentit.
Por kjo është mes tyre dhe Presidentit, nuk më takon mua të komentoj. Unë e respektoj shumë Presidentin e këtij vendi.
A jeni takuar me Kryeministrin e Shqipërisë këtë javë apo ditë?
Jo këtë javë.
