“SPAK të hetojë krimet zgjedhore!”. Kështu u shpreh Ambasadori i Bashkimit Europian në Shqipëri, Luigi Soreca, duke folur sot gjatë një takimi në Durrës me persona me aftësi ndryshe, ku u diskutua edhe për zgjedhjet e 25 prillit. Në fjalën e tij, ai ka kërkuar të dëgjojë ankesat, duke kërkuar që të hetohen të gjitha parregullsitë në mënyrë që sipas tij, të mësohet se ku ka ‘çeduar’ procesi i zgjedhjeve parlamentare. “Arsyet e turit tim në Shqipëri janë dëgjimi i zërit të komuniteteve, zëri i të cilëve nuk është dëgjuar. Dua të dëgjoj problematikat, për të kuptuar se çfarë ka funksionuar dhe çfarë jo. Kjo për t’i bërë zgjedhjet lokale më të mira. Ne kemi qenë prezent në ditën e zgjedhjeve dhe procesin e numërimit. Objektivi ishte te monitoronim procedurën dhe zbatimin e Kodit Zgjedhor. OSBE/ODIHR folën e thanë se zgjedhjet ishin të rregullta e pa probleme. Ka pasur përmirësime nga zgjedhjet e mëparshme. Por për ne është e rëndësishme që të shikohen parregullsitë. SPAK ka mandat për të hetuar krimet zgjedhore. Ne po i ndjekim çështjet nga afër,”-tha Soreca.
Një natë më parë, edhe ambasadorja amerikane në Tiranë, Yuri Kim, kërkoi nga KQZ që të hetonte dhe merrte vendime lidhur me kërkesat e opozitës për hetimin e shkeljeve në zgjedhje. “KQZ duhet të hetojë dhe të marrë një vendim”, tha Kim gjatë intervistës me Blendi Fevziun në emisionin “Opinion”.
