Ambasadori gjerman Peter Zingraf në çeljen e Konferencës “Tetori Gjerman” theksoi se reformat e ndërmarra nga Shqipëria në jetën politike dhe sociale duhet të shkojnë më thellë.
Sipas Zotit Zingraf kushtet e vendosura nga Bundestagu duhet të plotësohen në dy faza: “Budestagu gjerman dha një ‘po’ për Shqipërinë, ai luan një rol të fuqishëm dhe qeverisë federale i nevojitet ky vendim i Bundestagut gjerman, kjo është një dëshmi se Shqipëria do të pranohet në Bashkimin Evropian. Bundestagu ka formuluar disa kushte që disa duhet të përmbushen në fazën e parë dhe të tjerat në fazën e dytë”.
Ambasadori gjerman në Tiranë komentoi edhe krizën politike në vend, për të cilën tha se zgjidhja duhet të vijë nga vetë politika: “Jam i bindur që zgjidhja për konfliktet politike duhet të vijë nga vetë politika. Nuk e shikoj Gjermaninë si një lloj ndërmjetësi. Kemi folur me përfaqësues të partive politike, kemi ofruar mbështetjen tonë teknike, edhe për reformën zgjedhore”.
