Ambasadorja e Gjermanisë në Tiranë Susanne Schutz, deklaroi se vendi i saj në kuadër të projektit të vlerësimit e hartimit të strategjive për luftimin e korrupsionit do të ndihmojë Inspektoratin Qendror me projekte konkrete metodologjike e financiare për realizimin e reformës në sistemin e inspektimit.
Deklarata e zonjës Schutz erdhi në një takim që pati sot me Inspektorin e Përgjithshëm Z. Shkëlqim Hajdari, pranë ambienteve të ambasadës gjermane.
Në këtë takim zoti Hajdari i prezantoi zonjës Schutz situatën në të cilën ndodhet Inspektimi në Shqipëri dhe reformat që duhet të ndërmerren në këtë fushë të rëndësishme e me ndikim, në të gjithë sektorët e ekonomisë dhe shoqërisë në tërësi.
Inspektori i Përgjithshëm, theksoi se kjo reformë po kryhet në bashkëpunim me biznesin, me institucionet rregullatore të vendeve të Bashkimit Europian, si Gjermania, Franca, Britania e Madhe etj, si dhe me akademikë e profesorë të shquar.
Ambasadorja Gjermane, Znj. Susane Schutz e vlerësoi Projektin e Reformimit të Sistemit të inspektimeve në Shqipëri, si një projekt serioz e profesional, për reformimin e trupave të inspektimit, siç janë në vendet e Bashkimit Europian.
Gjatë takimit, ambasadorja u njoh me projektin e reformimit të sistemit të inspektimit, që bazohet në katër shtylla:
1. Ristrukturimi i Inspektorateve Shtetërore duke ulur numrin e tyre.
2. Ndryshimet e ligjit nr.10433, datë 16.06.2011, “Për Inspektimin në Republikën e Shqipërisë”, duke synuar futjen e elementëve të karrierës në punësim, e ngritjen në detyrë të Inspektorëve Shtetërore.
3. Fuqizimin e kapaciteteve digitale bashkëkohore për të kryer Inspektimet me dokumente standarde, metodika bashkëkohore, bazuar në risk, online, pranë biznesit e në prani të tij.
4. Domosdoshmëria për ngritjen e Laboratorëve Shtetërore të akredituara e të pavarura private për kryerjen e analizave të produkteve, objekte të inspektimit, me paanshmëri e në mënyrë shkencore.
Inspektori i Përgjithshëm theksoi se kjo reformë duke kaluar në këto etapa shmang korrupsionin, klientelizmin dhe rrit transparencën e punës së trupave inspektuese duke formalizuar biznesin e ndershëm në Shqipëri.
