Deputeti i Partisë Demokratike, Enkelejd Alibeaj, ka dalë ditën e sotme në një konferencë për media, ku ndër të tjera deklaroi se nesër do i drejtohen Gjykatës Kushtetuese me një kërkesë për shfuqizimin e Bordit të Transparencës. Ai u shpreh se ky bord përbëhet nga një “klub oligarkësh” që paracaktojnë çmimet e karburanteve, sipas interesave të tyre. Alibeaj tha se prioritetet janë bazuar në 3 shtylla kryesore: Reforma legjislative; mbrojtja e interesit të qytetarëve dhe kontrolli parlamentar.
Sakaq, Alibeaj paralajmëroi se është përgatitur një padi në Gjykatën Kushtetuese, ku do të kërkohet shfuqizimi si antikushtetues i dy ligjeve që funksionon bordi i përcaktimit të çmimit të naftës, benzinës dhe gazit.
“Dua të informoj opinionin publik se Grupi Parlamentar i Partisë Demokratike, ka përgatitur dhe ditën e nesërme do të depozitojë në Gjykatën Kushtetuese, kërkesën për shfuqizimin si antikushtetues të dy ligjeve mbi bazën e të cilave funksionon Bordi i paracaktimit të çmimit të naftës, benzinës dhe gazit”, u shpreh Alibeaj.
