Deputeti i Partisë Demokratike, Enekelejd Alibeaj ka reaguar menjëherë pas zbulimit të dokumentit të vendimit për arrestimin e Dritan Zaganit. Me anë të një statusi në rrjetin social në “Facebook” Alibeaj thotë se ky është autogol i Kryeministrit Edi Rama.
Pak më parë kreu i grupit parlamentar të Partisë Socialiste, Taulant Balla, ka publikuar në Facebook vendimit e arrestimit me 3 vite burg të Dritan Zaganit. Balla më herët e quajti kreun e PD-së Lulzim Basha ‘gënjeshtar’ pas deklaratave të tij se ish-kreu i antidrogës Dritan Zagani nuk është dënuar.
Statusi i plotë i Alibeaj
Autogoli i Ramës: Balla konfirmon zyrtarisht gënjeshtrën për Zaganin
Para dy ditësh Rama gënjeu drejtpërdrejt miliona shqiptarë, kur për të mbrojtur Tahirin dhe Habilajt, sulmoi përsëri Dritan Zaganin si “të dënuar nga Krimet e Rënda”. Sot për të dytën herë rradhazi Balla konfirmoi zyrtarisht gënjeshtrën e Ramës:
- Vendimi është i gjykatës së Vlorës, dhe jo i Krimeve të Rënda, sic tha Rama.
- Është për largim nga vendi, jo për shpërdorim të detyrës.
Pasi Zagani zbuloi dhe denoncoi trafikun e drogës së Habilajve, Saimir Tahiri dërgoi oficerët e shërbimit të kontrollit të brendshëm të Ministrisë së tij dhe e arrestoi në mes të natës.
Po këta vartës të Tahirit e paditën Dritan Zagarin në prokuroirnë e krimeve të rënda. Por akuzat e tyre ishin kaq të pabaza sa Prokuroria e Krimeve të Rënda nuk e mori përsipër hetimin dhe ja kaloi çështjen Prokurorisë së Vlorës vetëm për shpërdorim detyre.
Dritan Zagani u largua nga Shqipëria sepse zbuloi se krimi dhe qeveria ishin bërë një. Zagani e kuptoi para të gjithëve se Tahiri dhe Rama ishin në shërbim të krimit dhe të vetmit oficerë policie që ata toleronin ishin ata që ngarkonin thasët e drogës dhe fiknin radarët. Zagani iku sepse e kuptoi se jeta e tij dhe e familjes së tij ishin të rrezikuara. Zvicra i dha azil politik.
Siç janë detyruar ta pranojnë vetë, dhe sic faktojnë përgjimet e Antimafias, për katër vite krerët e policisë kanë bashkëpunuar me trafikantët. Por në këto katër vite, Saimir Tahiri dhe Edi Rama kanë akuzuar, arrestuar dhe sulmuar vetëm një njeri: Dritan Zaganin. Kjo tregon më thjeshtë se gjithcka se në anën e kujt kanë qenë Saimir Tahiri dhe Edi Rama.
Pas gjithë këtij persekutimi, dëshpërimi dhe paniku i Edi Ramës tani ka arritur në nivele të tilla sa kërkon mbrojtje prej Taulant Ballës. Që ky i fundit e nxorri Ramën bllof dhe zyrtarisht gënjeshtar, është sa shenjë e trashjes së tij, aq edhe triumf i Dritan Zaganit dhe të vërtetës mbi Edi Ramën.
