Ish-kryeministri demokrat, Aleksandër Meksi, i cili ka vite që është tërhequr nga jeta aktive politike, ka folur për rritjen e çmimeve në Shqipëri. I ftuar në “ABC e Mëngjesit”, ai pranoi se është kryeministri që ka ngritur dy herë çmimin e bukës dhe të nesërmen e ka bërë rrugën në këmbë për në zyrë. Ai tha më tej se shqiptarët kuptuan se po bënin një ndryshim epoke, dhe atëherë nuk u ankua asnjëri.
“Unë jam kryeministri që kam ngritur dy herë çmimin e bukës. Shqiptarët arritën ta kuptojnë se po bënin një ndryshim epoke, dhe atëherë nuk u ankua asnjëri. Një gazetare që takova më pyeti që ça ke bërë për gratë. I hoqa turnin e tretë, i thash. Nuk e rrëzoi komunizmin Shqipëria, erdhi koha e ndërrimit të sistemit.
U pëlqeu epoka e ndryshimit dhe ishte ndryshim shprese. Në rrogë u dha kompesimi aq sa jepet edhe sot, në çdo vend të botës”, tha Meksi.
Aleksandër Meksi, pas fitores së Partisë Demokratike në 22 mars 1992, më 13 prill u zgjodh kryeministër i Qeverisë Demokratike, post që e mbajti deri në 13 mars 1997 (pasi dha dorëheqjen në 1 mars). Qeveria Meksi ndërmori reformimin e shtetit shqiptar nga një shtet i diktaturës së proletariatit në një shtet demokratik të së drejtës, me ekonomi të tregut të lirë, ku respektohen të drejtat e njeriut.
