Ashtu siç ishte paralajmëruar, aleatët e Bashës kanë mbërritur në zyrën e Presidentit, për të zhvilluar një takim me Metën.
Takimi i kërkuar nga krerët e partive të qendrës së djathtë, Mediu, Duka, Shehi, Ndoka dhe Dule, ka për qëllim inicimin e një tryezë të gjerë nga kreu i shtetit, ku të marrin pjesë të gjithë aktorët politikë.
Në një konferencë për mediat, aleatët e Bashës dje prezantuan platformën e tyre politike prej 12 pikash, të cilën do ia paraqesin edhe Presidentit Meta për të gjetur një konsensus të gjerë në funksion të zgjidhjes së krizës politike.
Partitë e vogla të koalicionit opozitar kanë theksuar se me Edi Ramën Kryeministër, proces zgjedhor nuk do të ketë. Ditën e djeshme, Mediu, Duka, Shehi, Ndoka dhe Dule zhvilluan një takim me Bashën dje në orën 19:00.
Kreu i PBDNJ-së, Vangjel Dule, theksoi pas takimit, se zgjedhje vendore vetëm me një palë pjesëmarrëse nuk do të ketë, prandaj i bëri thirrje Kryeministrit të heqë dorë nga arroganca.
“Do t’i paraqesim platformën tonë, që përbën një bazë të mirë për të nisur përpjekjen e të gjitha palëve për konsensusin e domosdoshëm, që kërkon realiteti ynë. Zgjedhje me një palë nuk duhet, nuk mund dhe nuk do të ketë. Arroganca, prepotenca e zotit Rama nuk i shërben këtij objektivi”, tha Dule.
