Kryeministri i Kosovës Albin Kurti ka emëruar dy zëvendësministra të rinj në kabinetin e tij qeveritar.
Bëhet fjalë për Taulant Kryeziun dhe Imri Demelezin.
Kryeziu është emëruar zëvendës-ministër në Ministrinë e Integrimit Evropian, ndërsa Imri Demelezi në ministrinë e Bujqësisë, Pylltarisë dhe Zhvillimit Rural.
Pas emërimit, ka reaguar Kryeziu, duke theksuar se “është i lumtur që në detyrën e re i bashkohet ekipit të jashtëzakonshëm të Ministrisë së Integrimeve Evropiane të udhëhequr nga Blerim Reka”.
“Jam i vetëdijshëm se suksesi jonë varet nga shumë miq, kolegë dhe partnerë. Agjenda Evropiane është agjendë më unifikuese e shoqërisë tonë. 90% e qytetarëve të Republikës së Kosovës mendojnë se anëtarësimi në BE është gjë e mirë. Suksesi im do varet nga puna ekipore e gjithë kabinetit qeveritar. Unë do jem çdo herë në përkrahje të secilit ministër për të siguruar zbatimin e MSA-së në çdo fushë të qeverisjes.
Në fund, por me shumë rëndësi, dua të falënderohem të gjithë qytetarëve të Republikës së Kosovës të cilët më kanë votuar për deputet të Kuvendit të Republikës së Kosovës. Vota e lirë e qytetarëve është mjet më sublim i avancimit të shoqërive demokratike. Nuk mund të shpreh mjaftueshëm vlerësimin tim për nderin që më keni bërë. Tani është radha ime të ju nderoj”, ka deklaruar ai.
