Teksa pritet inaugurimi i Joe Biden si President i 46-të i SHBA-ve, një befasi ka ndodhur shumë afër Capitol, pikërisht në Gjykatën e Lartë.
Stafi i këtij institucioni është evakuar pasi ka një alarm për bombë. Lajmi bëhet i ditur nga CNN teksa thuhet se janë shtuar forcat e Gardës Kombëtare.
Kërcënimi vjen teksa njerëzit po dynden drejt Capitol për inaugurimin e Presidentit të zgjedhur, Joe Biden.
Vendi ku do të bëhet inaugurimi është i rrethuar me gardh të lartë të mbuluar me tela me gjemba, mes masave të pashembullta të sigurisë, që nuk janë parë në inaugurimet e kaluara.
Siguria është më në qendër se zakonisht, ndërsa inaugurimi vjen dy javë pasi mijëra mbështetës të Trump sulmuan Capitolin pasi ai i nxiti ata të marshonin drejt ndërtesës, ndërsa ligjvënësit ishin mbledhur për të konfirmuar fitoren e Biden.
