Cristiano Ronaldon e pret një betejë e gjatë ligjore. Ajo mund të zgjasë më shumë se 2 vjet. Bëhet fjalë për çështjen Mayorga. Kjo është ajo që publikohet nga ‘Correia de Manha’. Media portugeze citon një burim anonim juridik. Në të thuhet se, avokatët mbrojtës të futbollistit për këtë çështje, janë të përgatitur tashmë për një proces gjyqësor të gjatë.
Gazeta portugeze e citon këtë burim i cili ndër të tjerat shpjegonte se policia po vazhdon ende hetimet. Akuzat për përdhunim të ngritura nga Kathryn Mayorga në drejtim të Cristiano Ronaldos, nuk mbyllen shpejt. Kështu që ajo mund t’i kalojë Prokurorisë së Përgjithshme. Kjo e fundit do të vendosë nëse do të formulojë akuzë ndaj futbollistit. Vendimi i saj do vijë pasi të ketë analizuar në detaj provat e paraqitura.
Ekipi ligjor, i Ronaldos, kryesohet nga Peter Christiansen. Ky i fundit ka bërë tashmë të ditur se do të merret në mënyrë ekskluzive me këtë çështje. E gjithë lufta do të bëhet që portugezi të vijojë jetën e tij normalisht. Ai duhet të përqendrohet në aktivitetet sportive me Juventusin, me bardhezinjtë që do të luajnë ndeshjen e radhës në Serinë A ndaj Genoas.
