Sekretar i Përgjithshëm i PD, Gazment Bardhi ka reaguar pas paralajmërimit të kryebashkiakut të Vaut të Dejës, Mark Babani, i cili tha se do ngrinte padi ndaj tij. Ndërsa hodhi poshtë pretendimet e PD-së se më 4 prill të 1994 ishte arrestuar nga autoritetet italiane.
Nga ana tjetër, reagimi i Bardhit ka qenë i menjëhershëm, teksa u shpreh se Babani ka përdorur deri në 7 emra për t’iu fshehur drejtësisë italiane.
“Marq Babaj bën shumë mirë që paska avokatë, se do t’i duhen për të negociuar vitet e burgut për fshehje të faktit që është arrestuar për vjedhje makinash në Siçili më në 4 Prill 1994. Derisa të bëjë gati padinë ndaj meje, të përgjigjet edhe për një fakt tjetër nga jeta e tij nëpër “hotelet” e Italisë.
Në datën 24 Janar 1996 në cilin hotel ke bujtur?
Nëse për këtë Marq Babaj nuk e ka kujtesën shumë të fortë, do t’ia rifreskojmë në vazhdim. Mirë është që hajduti i makinave të Siçilisë të mos ia qajë hallin Edi Ramës, se atij i duhet avokat për vete.
p.s: Kur Marq Babaj të më padisë, të më njoftojë me cilin nga 4-5-6-7 emrat që ka përdorur Mark Babani i Edi Ramës për t’iu fshehur drejtësisë italiane, duhet ta kërkoj në sistemin e gjykatës”, tha Bardhi.
