Cristiano Ronaldo është liruar tashmë nga akuzat për përdhunim, pasi denoncuesja e tij ka vendosur t’i tërheqë ato.
Katheryn Mayorga bëri një denoncim në 27 shtator 2018, kundër Ronaldos duke e akuzuar yllin portugez se ai e kishte përdhunuar në suitën e një hoteli në Las Vegas, dhe sipas saj më pas ai i kishte ofruar 375.000 dollarë në këmbim të heshtjes.
Ronaldo u shpreh në mediat sociale asokohe se nuk kishte kryer ndonjë veprim të gabuar dhe tha se gjithçka që kishte ndodhur midis tyre ishte konsensuale.
“Unë i mohoj tërësisht akuzat që po lëshohen kundër meje. Përdhunimi është një krim i neveritshëm që shkon kundër çdo gjëje që unë jam dhe besoj”, shkroi Ronaldo në Twitter.
Nuk dihet ende nëse tërheqja e akuzave të jetë bërë si shkak i ndonjë marrëveshjeje midis futbollistit dhe akuzues.
Këto akuza i kanë kushtuar shumë futbollistit të njohur pasi në mars u raportua se Juventusi nuk do të merrte pjesë në Kupën Ndërkombëtare të Kampioneve në SHBA këtë verë, për të shmangur rrezikun që Ronaldo të ndalohej nga autoritetet amerikane, si pjesë e një hetimi për përdhunim.
Gjithashtu përflitet se ky skandal i kushtoi skuadrës së Juventusit vitin e kaluar rënie deri në 15% të aksioneve. /Tirana Today
