Aktorja Jane Fonda ka zbuluar se është diagnostikuar me kancer dhe po bën kimioterapi. Në një postim për 1.9 milionë ndjekësit e saj në Instagram, 84-vjeçarja tha se ka limfomën jo-Hodgkin.
Fonda e përshkroi atë si “një kancer shumë të trajtueshëm… kështu që ndihem shumë me fat”.
Ikona e Hollivudit përdori postimin e saj për të theksuar gjendjen e kujdesit shëndetësor në SHBA, dhe tha se do të vazhdojë me aktivizmin e saj për klimën. Ajo shkroi se ndihej me fat, sepse kam sigurim shëndetësor dhe akses në mjekët dhe trajtimet më të mira.
“E kuptoj, dhe është e dhimbshme, që jam e privilegjuar në këtë. Pothuajse çdo familje në Amerikë është dashur të përballet me kancerin në një kohë ose në një tjetër, dhe shumë nuk kanë akses në kujdesin shëndetësor cilësor që unë marr dhe kjo nuk është e drejtë”.
Limfoma jo-Hodgkin është një kancer më pak i zakonshëm që zhvillohet në sistemin limfatik – rrjeti i gjerë i enëve dhe gjëndrave në trup. Fonda shkroi se ajo do t’i nënshtrohet gjashtë muaj kimioterapi, por “nuk do të lejojë që kjo të ndërhyjë në aktivizmin tim për klimën”.
Aktorja fituese e Oskarit bëri debutimin e saj në vitin 1960, duke u bërë e famshme për luajtjen në filma duke përfshirë Barbarella, Nine to Five dhe On Golden Pond. Performanca e saj më e fundit ishte në serialin komedi të Netflix, Grace and Frankie.
Fonda njihet edhe si aktiviste politike. Në vitet 1960 ajo kundërshtoi me zë të lartë Luftën e Vietnamit. Kohët e fundit ajo u bë një aktiviste kundër ndryshimit të klimës. Në vitin 2016, ajo kaloi Ditën e Falënderimeve mes protestuesve në Standing Rock, duke demonstruar kundër ndërtimit të gazsjellësit Dakota Access.
Në postimin e saj, Fonda tha se diagnoza e saj ka nxjerrë në pah rëndësinë e komunitetit për të. “Kanceri është mësues dhe unë po i kushtoj vëmendje mësimeve që më jep. Një gjë që më ka treguar tashmë është rëndësia e komunitetit. Për rritjen dhe thellimin e komunitetit në mënyrë që të mos jemi vetëm. Dhe kanceri, së bashku me moshën time – pothuajse 85 – mëson patjetër rëndësinë e përshtatjes me realitetet e reja. Ne po jetojmë në kohën më të rëndësishme në historinë njerëzore, sepse ajo që bëjmë ose nuk bëjmë tani do të përcaktojë se çfarë lloj të ardhmeje do të ketë dhe unë nuk do të lejoj që kanceri të më pengojë të bëj gjithçka që mundem”.
Burimi i lajmit: BBC. Përshtatur nga Tirana Today
