Aktori i humorit, Rezart Veleshnja, i ftuar sot në emisionin “Rreze Dielli” në “Report TV”, ka rrëfyer një episod aspak të këndshëm që i ka ndodhur pak vite më parë. Ai është kërcënuar nga truproja i ish-kryeministrit Sali Berisha, që të mos e imitojë më shefin e tij. Më e rëndë bëhej deklarata e tij kur tha se dikur, Sali Berisha dërgonte njerëz për të dhunuar aktorët që e imitonin. Badigardi e ka kërcënuar me plumb kokës, nëse e imitonte shefin e tij.
“Imitimi është dashamirësi, nuk është dashakeqësi. Pavarësisht se dikur Sali Berisha i rrihte ata që e imitonin. Po kur e imitonin, Saliu dërgonte njerëz që ti rrihnin, badigardët e vet. Mua më ka ndodhur, më ka ardhur badigardi më ka thënë; po e imitove edhe një herë, do të fus plumbin kokës. Ka qenë badigardi i Berishës, një bjond i gjatë, i shëndoshë”.
Por duket se këtë situatë ai e ka marrë me mjaft sportivitet. Madje ai shtoi se në vendin tonë, nuk të vret njeri për llafe por për para.
“Çfarë bëra? I thashë hajde më gjuaj. Po këtu në Shqipëri nuk të vret njeri për llafe, apo për imitime, janë kot. Në Shqipëri shaj sa të duash, shpif sa të duash, bëj çfarë të të dojë e bardha zemër, nuk të vret njeri. Po ndërhyre tek lekët, aty të vrasin. Këtë e kam nga Bledi Mane”.
