Policia e Kosovës ka përcjellë detaje të reja lidhur me rastin e rëndë të ndodhur në Shtëpinë e të Moshuarve “Orenda” në Pejë, ku një e moshuar është sulmuar fizikisht nga infermieret. Në lidhje me rastin, në pranga kanë rënë tre punëtore të Shtëpisë së të Moshuarve.
Të njëjtat dyshohen për veprat penale “Sulmi/moslajmërimi i përgatitjes së veprës penale/fotografim dhe incizimet tjera të paautorizuar”.
“Pejë 29.10.2022 – NN. Pas publikimit në media të një video ku shihet se keqtrajtohet një person i moshuar i gjinisë femërore në një shtëpi te pleqve në Pejë. Në lidhe me rastin janë identifikuar dhe arrestuar tri të dyshuara të gjinisë femërore kosovare, punëtore në shtëpinë e lartcekur”, thuhet në raportin policor.
Aurona Pelaj nga fshati Novosellë e Pejës, prej disa muajsh punonte në qendrën e të moshuarve ”Orenda”. Ajo është arrestuar nga Policia e Kosovës.
Nëna e dëshmorit të UÇK-së, Taulant Nuraj, la qendrën e azilit, aty nga ku u dhunua në mënyrë brutale nga disa punonjëse. E moshuara është nxjerrë nga qendra “Orenda” në Pejë nga vajza dhe dhëndri i saj.
Në videon e publikuar në rrjetet sociale, njëra nga punonjëset shihet tek e godet të moshuarën në mënyrë të vazhdueshme, teksa kjo e fundit mundohet të rezistojë. Punonjësja Aurona Pelaj, vazhdon me dhunën madje duke u mburrur me faktin që di të bëjë edhe më shumë para dy punonjësve të tjera.
