Dhomat e Specializuara në Hagë njoftojnë se ish-kreu i Partisë Demokratike të Kosovës, Kadri Veseli, do të bëjë paraqitjen e parë para gjyqit të këtij institucioni, më 10 nëntor.
Siç njoftojnë Dhomat e Specializuara, seanca do të nisë në orën 15:00 dhe do të jetë publike.
Veseli u transferua në qendrën e paraburgimit të Dhomave të Specializuara në Hagë më 5 nëntor.
Aktakuza ndaj tij për krime lufte ishte konfirmuar nga një gjykatës i procedurës paraprake më 26 tetor, por nuk u bë publike deri më 5 nëntor.
Ndërkohë, deputeti i Kuvendit të Kosovës, Rexhep Selimi do të paraqitet para këtij instituconi më 11 nëntor në orën 11:00.
Veseli, Thaçi, Selimi dhe ish-kryetari i Kuvendit të Kosovës, Jakup Krasniqi, përmes një aktakuze të përbashkët akuzohen për krime lufte dhe krime kundër njerëzimit, dhe të gjithë gjenden në qendrën e paraburgimit në Hagë.
