Peniani kundërshton sanksionet e reja të Këshillit të Sigurimit të OKB-së, duke i konsideruar ato si “një akt lufte”, tha të dielën zëdhënësi i Ministrisë së Jashtme të Koresë së Veriut.
“Ne e përcaktojmë këtë ‘rezolutë sanksionesh’ të manipuluara nga SHBA dhe pasuesit e saj si një shkelje e rëndë mbi sovranitetin e Republikës sonë, si një akt lufte që shkel paqen dhe stabilitetin në gadishullin Korean dhe në rajon dhe kundërshton kategorikisht rezolutën” tha zëdhënësi në një deklaratë të shpërndarë nga Agjencia Qendrore Koreane e Lajmeve (KCNA).
Këshilli i Sigurimit të OKB-së vendosi të premten masa të reja shtërnguese, si përgjigje ndaj testeve raketore balistike që Peniani vazhdon me kokëfortësi të realizojë.
Rezoluta e hartuar nga Shtetet e Bashkuara dhe e mbështetur unanimisht nga të gjithë anëtarët e tjerë të Këshillit përfshin shkurtimin e importeve koreano-veriore të naftës deri në masën 90%.
Vendi është tashmë subjekt i një serie sanksionesh të vendosura nga Amerika, OKB-ja dhe Bashkimi Europian. Por pavarësisht të gjithave, Peniani vazhdon të mbetet sfidues.
Shtetet e Bashkuara, – sipas tij, – janë të tmerruara nga arritjet e jashtëzakonshme të Koresë së Veriut në drejtim të zhvillimit të forcës së saj bërthamore, ndaj dhe lëvizjet e administratës amerikane për të shtuar presionin mbi Penianin po bëhen gjithmonë e më të tërbuara.
“Por ne do ta konsolidojmë edhe më shumë veprimtarinë tonë nukleare vetëmbrojtëse, që synon çrrënjosjen e kërcënimeve atomike të Uashingtonit, shantazheve dhe lëvizjeve armiqësore të tij, për të krijuar kështu një barazpeshë praktike force me Amerikën”, thuhet në deklaratë.
Uashingtoni këmbëngul se është duke kërkuar një zgjidhje diplomatike të krizës, e për këtë arsye vendosi të hartonte këtë raund të ri e të ashpër sanksionesh.TIRANA TODAY
