Një 25-vjeçar është vënë në pranga nga ana e policisë, lidhur me aksidentin me dy të vdekur në aksin Elbasan-Cërrik. Dy viktimat u identifikuan si 56-vjeçari F.Qosa, i cili ka vdekur në duart e mjekëve dhe E. Driza 35-vjeç. Ky i fundit ishte drejtues i mjetit motorçikletë, dhe humbi jetën në vendin e ngjarjes.
Njoftimi i policisë:
Specialistët e Qarkullimit Rrugor në DVP Elbasan, në përfundim të veprimeve të para hetimore arrestuan në flagrancë shtetasin A.Sh., 25 vjeç, banues në fshatin Jagodin, Elbasan.
Arrestimi i tij u bë pasi duke drejtuar mjetin tip “Audi”, në aksin rrugor Elbasan- Cërrik, në fshatin Shirgjan, Elbasan, është përplasur me motoçikletën dhe për pasojë kanë humbur jetën drejtuesi i motoçikletës shtetasi E.D., 35 vjeç, dhe pasagjeri i motoçikletës shtetasi F.Q., 56 vjeç, banues në fshatin Shirgjan, Elbasan.
Materialet hetimore i kaluan Prokurorisë pranë Gjykatës së Shkallës Parë Elbasan, për veprime të mëtejshme.
