Pas akuzave të hedhura në drejtim të policisë dhe prokurorisë lidhur me mundësinë e manipulimit të provave dhe vendit të ngjarjes së aksidentit ku deputeti Aqif Rakipi goditi për vdekje një 53 vjeçar, ka ardhur edhe reagimi i Policisë së Shtetit.
Sipas saj, çdo veprim është kryer në përputhje me ligjin dhe nuk është prekur asgjë nga vendi i ngjarjes për t’i ardhur në ndihmë prokurorisë për të vijuar më tej hetimet.
Sqarimi i Policisë së Shetit:
Sqarim në lidhje me aksidentin e ndodhur me përfshirjen e deputetit A.R:
“Menjëherë me marrjen e njoftimit, janë marrë masa për sigurimin e vendit të ngjarjes, dhe kryerjen e veprimeve procedurale me drejtuesin e automjetit të përfshirë në aksident.
Pavarësisht lëvizjes nga vendi i ngjarjes dhe paraqitjes në Komisariatin e Policisë të drejtuesit të automjetit, theksojmë se janë kryer të gjitha veprimet hetimore dhe procedurale, ekzaminimet e ndryshme kriminalistike , testi i alkoolit dhe sqarimi i rrethanave të ngjarjes.
Automjeti i përfshirë në ngjarje ndodhet në ambientet e Komisariatit të Policisë në gjendjen e dorëzimit menjëherë pas ngjarjes, i sekuestruar në cilësinë e provës materiale. Çdo veprim është kryer me korrektësi të plotë nën drejtimin e Prokurorit të Rrethit Gjyqësor Tiranë. Policia e Shtetit thekson edhe njëherë, se është e do vazhdojë të jetë garante e zbatimit të ligjit pavarësisht nga statuset apo përfaqësimet e subjekteve .
