Aksi i superstradës Thumanë-Fushë Krujë prej disa ditësh po bëhet makthi i drejtuesve të automjeteve. Kjo për shkak të punimeve që kryhen në rikonstruksionin pranë urës në Thumanë.
Punonjësit e një firme, prej katër ditësh po instalojnë në ndarjet e urës pjesë infrastrukturore, duke bërë që qarkullimi në këtë pjesë të rrugës të bëhet vetëm në njërin sens të rrugës dhe për pasojë vargu i automjeteve ka arritur deri në pesë kilometra.
Ndërkohë, punimet kanë shkaktuar pakënaqësi edhe te drejtuesit e automjeteve, të cilët “shfryjnë” me mllef nga radhët e gjata që krijohen dhe vonesat, sidomos në orët e mbrëmjes.
Punonjësit e qarkullimit rrugor kryejnë shërbimin e tyre pranë një pike të vetme aty ku kryhen punimet, ndërsa janë regjistruar dhe disa aksidente, por fatmirësisht pa pasoja.
Ndonjëherë aksidentet janë shkaktuar edhe për shkak të hyrjeve të gabuara nga ana e drejtuesve të mjeteve në aksin ku po kryhen punimet, duke sjellë për rrjedhojë bllokimin e qarkullimit. Tirana Today, Ahmet Zani
