Aleanca Kosova e Re (AKR), nuk do të jetë pjesë e koalicionit qeverisës LDK-AAK-NISMA. Pavarësisht këtij vendimi, bëhet me dije se votat e AKR-së në Kuvend, do të shkojnë për formim të qeverisë Hoti.
Në një prononcim për IndeksOnline, kryetari i AKR-së, Behgjet Pacolli, ka thënë se është pro integrimit të vendit.
“AKR nuk do të jetë pjesë e qeverisë së ardhshme, por ne do t’i sigurojmë votat tona për formimin e qeverisë Hoti. Jam çdo herë për ndërtim dhe integrim të shtetit. Unë shpresoj që qeveria e drejtuar nga Avdullah Hoti, do të jetë e suksesshme”, ka thënë Pacolli.
I pyetur se nëse të shtunën thirret seanca për votimin e qeverisë, a do të jetë i pranishëm, ai ka konfirmuar pjesëmarrjen. “Unë jam deputet i Kuvendit të Republikës së Kosovës dhe nëse nuk pengohem të futem në Kosovë, sigurisht që do të jem i pranishëm kurdo që thirret seanca për votim të qeverisë”, ka deklaruar Pacolli.
