Lideri i BDI-së, Ali Ahmeti ka zhvilluar një tubim në Dibër, ku prezantoi kandidatin për kryetar komune dhe listën e këshilltarëve.
Gjatë fjalës së tij, Ahmeti theksoi se qytetarët duan progres dhe anëtarësim në NATO dhe BE, në mënyrë që të kenë lëvizje të lirë dhe të sigurojnë një ekonomi më të fortë.
Ahmeti përmendi edhe bashkëpunimin me Shqipërinë e Kosovën, ndërsa shtoi se po angazhohen edhe për zgjidhjen e çështjes së emrit me Greqinë.
“Angazhimi ynë është bashkëpunimi me të gjithë fqinjët, me Shqipërinë, Kosovën. Shenjë e mirë është marrëveshja me Bullgarinë si edhe angazhimet për zgjidhjen e çështjes së emrit me Greqinë. Punët po shkojnë në këtë drejtim, ndërsa kjo na e hap rrugën drejt NATO-s që do të thotë stabilitet jo vetëm për Maqedoninë, por edhe për rajonin, besim më të madh tek investitorët, zhvillim më të shpejtë dhe anëtarësim në BE. Ne dëshirojmë perspektivë evropiane për gjithë Ballkanin”, tha Ahmeti.
Sipas tij, Maqedonia gjatë dy viteve të kaluara pati krizë politike e cila mundej të çonte drejt përleshjeve ndëretnike, por me ndihmën dhe mbështetjen e partnerëve ndërkombëtarë, u arrit marrëveshje.
