Kreu i PAA, Agron Duka, ka dhënë komentin e tij në lidhje me kryebashkiakun e Durrësit, Vangjush Dako. Ai është treguar i drejtëpërdrejtë, duke thënë se Dako është i zoti në përfitimin e votave, përmes njerëzve që kanë influencë.
Reagimi i tij, tejet ironik, përcillet pas daljes së bisedave dhe përgjimeve për hetimin penal të një grupi trafikantësh, ku flitej dhe komunikohej për një person me pseudonimin “xhuxhi”. Po kështu ai nuk le pa përmendur faktin se nga këto veprime të Dakos, ka vuajtur edhe ai vetë.
“Unë e kam thënë vazhdimisht dhe e them sërish se Dako, ka pas një “zotësi”. Përfitimin e votave në mënyrë të padrejtë përmes lidhjeve të njerëzve që kanë influencë jo normale, dhe që fusin duart në votime.
Këtë e kam vuajtur dhe e kam parë vetë. Në përgjime nuk është përmendur Dako, por “xhuxhi”. Nëse “xhuxhi” është Michael Jordan, atëherë nuk qenka Dako.
Unë mendoj se ka një farë përafërsie të shtatlartësisë së Dakos me pseudonimin që i thuhet”, është shprehur Duka për “Vizion Plus”.
Sa i përket miratimit të ligjit që do të mbyllë pikat e basteve, kreu i PAA-së thotë se vendimi do të ketë efekte pozitive. Kjo vetëm nëse nuk ka prapaskena.
