Agjenti i pilotit: “Raikkonen me 200km/ orë, mendova se u përplasëm, ai qeshte’

Steve Robertson: “Kurrë nuk do ta harroj udhëtimin me Kimin dhe babanë tim nga Maranello për në Zvicër. Ishte vonë dhe po binte shi i madh.  Kimi gjithmonë ka dashur të ngasë vetë, por as mua nuk më pëlqente të isha pasagjer. Të them të drejtën, mendoj se Kimi beson që njerëzit e tjerë nuk mund ta ngasin makinën.

Në këtë udhëtim rruga ishte e mbuluar me dallgë uji por nuk kishte shumë makina të tjera. Fshirëset e xhamave ishin duke punuar fort, sepse binte shumë ujë. Kimi kishte një huq të çuditshëm që sediljen e shtrinte në një pozicion pothuajse horizontal. Shumë e ngjashme me pozicionin në një makinë tëFormulën 1.

Kimi ngiste me rreth 200 km/orë, shumë shpejt.

Isha i vdekur, i lodhur, por nuk mund të flija; vetëm mbahesha ku mundesha. Babai im poashtu.

Papritmas, makina filloi të devijonte me dhunë dhe unë në një moment e kuptova se po kthehej 180 gradë. Pashë barrierat mbrojtëse. Ishim gati të përplaseshim me barrierat. Po mendoja se ky ishte fundi.

Kimi e shpëtoi makinën duke e manovruar ndërsa vazhdonte të ishte në atë pozicion të çuditshëm qëndrimi.

Babai dhe unë ishim në gjendje shoku ndërsa ai qeshi dhe vazhdoi me të njëjtën shpejtësi.

burimi: Biografia e Kimi Raikkonen nga Kari Hotakainen

Përshtati: T. Kotorri