Kryeministri Edi Rama ka reaguar ashpër pas dhënies së çmimit Nobel në Letërsi për shkrimtarin austriak, Peter Handke. Me anë të një komenti në ‘Twitter”, Rama shprehet i revoltuar se asnjëherë nuk kishte menduar se do t’i vinte për të vjellë për shkak të një çmimi Nobel. Ai ndër të tjera nënvizon se paturpësia po bëhet pjesa më normale e botës ku jetojmë, dhe se turpi është vulosur si një vlerë e re.
“Asnjëherë nuk kam menduar se do të më vinte për të vjellë për shkak të një çmimi Nobel, por paturpësia po bëhet pjesa më normale e botës ku jetojmë.
Pas kësaj zgjedhje të turpshme të bërë nga një autoritet moral, siç është trupa e Akademisë së Nobelit, turpi është vulosur si një vlerë e re.
JO, ne nuk mund të bëhemi kaq të ftohtë ndaj racizmit dhe genocidit”, shkruan Rama.
Handke është një shkrimtar i urryer për shqiptarët e Shqipërisë dhe të Kosovës, pasi njihet për deklaratat dhe qëndrimet e tij antishqiptare, por edhe si adhurues i liderit serb, Sllobodan Millosheviç.
