Kryetarja e Bashkisë së Shkodrës, Voltana Ademi ka inspektuar zonën e përmbytur në Obot të Njësisë Administrative Zana e Malit.
Ademi ka dhënë alarmin për shumë zona, të cilat ende janë të përmbytura, ndërsa e vetmja mundësi për të parë nga afër situatën e rëndë dhe për të takuar banorët totalisht të izoluar, ishte lundrimi me varkat e ushtrisë.
Ademi ka takuar dhe ka bashkëbiseduar me banorë të Obotit, të cilët kërkojnë vëmendje nga strukturat qeveritare. Ata shprehen të shqetësuar nga heshtja e qeverisë ndaj kërkesës së bërë nga Bashkia e Shkodrës për shpalljen e gjendjes së emergjencës në zonat e përmbytura.
Kryetarja e Bashkisë i ka siguruar se do të vijojë të kërkojë, me të gjitha instrumentet e mundshëm ligjor e demokratikë, shpalljen e gjendjes së emergjencës. Ademi ka paralajmëruar edhe padi në prokurori për shpërdorim detyre si për keqmanaxhim të kaskadës së Drinit, por edhe për mosshpalljen e gjendjes së emergjencës nga strukturat përgjegjëse shtetërore.
