Një 48-vjeçar ka rënë në prangat e policisë, pasi akuzohet se ka abuzuar seksualisht me vajzën e tij. Arrestimi i tij erdhi pas denoncimit që e bija bëri mbrëmjen e sotme në emisionin “Fiks Fare”.
Duke iu referuar njoftimit të policisë, arrestimi i shtetasit me inicialet Sh.I u bë pasi dyshohet të ketë konsumuar veprën penale të ‘Marrëdhënie seksuale ose homoseksuale me persona në gjini ose nën kujdestari’, parashikuar nga neni 106 i Kodit Penal.
Materialet për veprime të mëtejshme do t’i kalojnë Prokurorisë pranë Gjykatës së Shkallës Parë Kurbin.
Gjithçka kishte filluar në Gjermani ku vajza, sot 18 vjeçe së bashku me familjen e saj kishin shkuar si azilantë. Ajo ishte vetëm 15 vjeçe dhe atje ishte njohur me një djalë, lidhja ishte marrë vesh edhe nga familjarët dhe një ditë i ati e kishte ftuar të dilnin të dy bashkë në shëtitje.
“Më çoi afër një liqeni, aty më tha ne do bëjmë të dy të njëjtat gjëra që ti ke bërë me atë djalin. Nëse do më kundërvihesh dhe do tregosh për çfarë do të ndodh këtu unë do të mbys në liqen”, tregon 18 vjeçarja.
Ky ishte vetëm fillimi, pasi babai mostër nuk kishte ditur më të ndalej, edhe pas kthimit në Shqipëri ai kishte vazhduar ta dhunonte fizikisht dhe seksualisht vajzën e tij. Me kalimin e kohës sa vinte e bëhej edhe më e rendë për 18 vjeçaren situata dhe kështu mundohej të gjente situatat për t’i shpëtuar dhunës seksuale të babait.
