Pas situatës kaotike në Greqi, një vemendje e shtuar është edhe për vendin tonë, ndërsa paniku ka kapluar të gjithë. Drejtori i Shërbimit Zjarrfikës, Shkëlqim Goxhaj, tha se zjarret janë të paparashikueshëm, prandaj të gjitha institucionet duhet të jenë në gatishmëri.
I ftuar në studion e lajmeve të “Ora News”, Goxhaj tha se përgatitja për përballimin e situatave të zjarrit ka nisur që në muajin maj. Ai shtoi më tej se këtë vit, përgatitjet kanë filluar me takimet me drejtuesit e njësive administrative, nën drejtimin e Prefektes së qarkut Tiranë. Po kështu ai apeloi ndaj qytetarëve, që në periudhën korrik, gusht, shtator, të mos përdorin zjarrin për të eliminuar mbeturina, apo për të hapur toka të reja.
“Nuk mund të themi se kjo verë ka kaluar dhe ne kemi kaluar situatën e vështirë, sepse pa pritur një zjarr me përmasa të mëdha, mund të shkaktojë dëme që nuk i shkaktojnë as 500 zjarre të përmasave më të vogla.
Zjarri është i paparashikueshëm dhe nuk e dimë si do të ballafaqohemi. Kryesorja është që ne të jemi të përgatitur, jo vetëm punonjësit e shërbimit zjarrfikës, por edhe institucionet e tjera përkatëse, që mbulojnë këto situata emergjente.
Në çdo fillim sezoni, fillojmë përgatitjet që në muajin maj. Këtë vit, përgatitjet kanë filluar me takimet me drejtuesit e njësive administrative, nën drejtimin e Prefektes së qarkut Tiranë.
Ne besojmë fort në parandalimin e këtyre ngjarjeve. Nëse qytetarët janë më të vëmendshëm, këto ngjarje mund të parandalohen, sepse dihet që temperaturat në vendin tonë, shumë rrallë mund të ndodhë që zjarri të vijë nga temperaturat, zjarr vjen nga pakujdesia dhe dora e njeriut.
Prandaj i bëjmë thirrje qytetarëve që në periudhën korrik, gusht, shtator, mos përdorin zjarrin për të eliminuar mbeturina apo për të hapur toka të reja”, tha ai.
