Vetëm pak minuta më parë, Partia Demokratike bëri publike për mediat një dokument, ku sipas të cilit, kryebashkiaku i Mallakastrës, Qerim Ismailaj ka qenë i dënuar me 3 vjet burg nga Gjykata e Kios në Greqi në vitin 2000.
Nga ana tjetër, disa ditë më herët, kryebashkiaku deklaroi se nuk ka asnjë dënim për të.
A përputhen të dhënat e dokumentit të PD-së me ato të kryebashkiakut Qerimaj të deklaruara në formularin e dekriminalizimit?
Vërtetësia e dënimit të tij tashmë është në dorën e prokurorisë për t’u verifikuar, por nga të dhënat e deklaruara në formuluar nga vet kryebashkiaku ka një përputhje plotë gjeneralitetesh me letrën e prokurorisë greke.
Konkretisht, Qerim Ismailaj në të dyja dokumentet ka të njëjtin emër, atësi, amësi, datëlindje si edhe të njëjtin numër të dokumentit të identifikimit, i cili është unik për çdo person.
Sipas ligjit të dekriminalizimit, asnjë subjekt i dënuar nuk mund të kandidojë për pozicione publike. Nëse këto akuza do të vërtetohen atëherë ai është subjekt i veprës penale të falsifikimit të dokumenteve shtetërore.
