Që prej tronditjes së madhe të regjistruar në Shqipëri, qytetarët janë frikësuar tej mase, ndërsa orët në vijim kanë qënë në ankth të plotë. Pas lajmit të rremë që u përhap në kohë reale, lidhur me një tërmet po kaq të fortë, qytetarët menjëherë nxituan të merrnin batanijet e të dilnin poshtë shtëpisë. Një pjesë prej tyre, të flinin në makinat e tyre.
Kjo zgjidhje e përkohshme, sipas tyre, ishte më e sigurtë pas tronditjeve që pasuan. Mijëra banorë, fëmijë, burra, gra dhe të moshuar lanë shtëpitë e tyre, duke iu drejtuar shesheve të Tiranës, për të minimizuar pasojat. Gjithçka erdhi pas paralajmërimeve në rrjetet sociale se rreth orës 23:30, Tirana do të goditej nga një tërmet 6 ballë, ndërsa lëkundjet e orës 22:10 perforcuan informacionin e përhapur në Facebook.
Sizmologu i njohur shqiptar, Rrapo Ormeni, ishte i ftuar në “Ftesë në 5” me Bieta Sulon, ku u fol për frikën nga lëkundjet e fundit që përfshinë vendin. I pyetur nëse makina është një vend i sigurt për të udhëtuar gjatë momentit që ka lëkundje, Ormeni tha se në raste të tilla as makina nuk është një vend që garanton siguri.
“Makina në lëvizje nuk është vend i sigurtë, pasi krijon lëvizje relative. Gjithnjë në këto raste, makina duhet fikur dhe duhet qëndruar në një vend me sa më shumë hapësirë”, sqaroi ai, duke theksuar më tej se këto situata janë gjithnjë të papritura, dhe të gjithë duhet të përpiqen të ruajnë qetësinë para se të marrin vendimet e radhës.
