Në Shtetet e Bashkuara, autoritetet shëndetësore federale kanë përditësuar kohët e fundit udhëzimet për përdorimin e maskave, duke i këshilluar shtetet individuale që të mos i bëjnë ato të detyrueshme në rrethana të caktuara.
Udhëzimet e reja, janë në përputhje me vlerësimet e ekspertëve të ndryshëm, të cilët javët e fundit kishin filluar një debat mjaft të nxehtë, nëse do të vazhdohej apo jo me imponimin e mbajtjes së maskave në ambientet e hapura. Në përgjithësi, ekspertët bien dakord se rreziqet e infektimit jashtë janë shumë të ulëta, sidomos nëse jeni vetëm apo me pak disa persona, dhe nëse ruani distancën.
Individët e vaksinuar kanë masa shtesë mbrojtëse. Ata janë të mbrojtur nga format e rënda të Covid-19, dhe nëse infektohen duhet të jenë më pak ngjitës. Prandaj ata mund të marrin disa më pak masa paraprake, nëse rregullat e lejojnë këtë gjë.
Për rreth 1 vit, maskat janë përdorur çdo ditë nga qindra miliona njerëz në të gjithë botën, dhe sipas ekspertëve, ato kanë kontribuar jashtëzakonisht shumë në ngadalësimin e përhapjes së pandemisë.
Në pranverën e vitit 2020 u bë gradualisht e qartë se koronavirusi përhapej kryesisht nga ajri, përmes spërklave të vogla të pështymës që çlirojmë të gjithë kur kollitemi, teshtijmë, flasim me zë të lartë, dhe në disa raste thjesht edhe kur marrim frymë (aerosolet).
Përqendrimi i grimcave virale mund të jetë shumë i lartë në ambiente të brendshme, ku ka pak shkëmbime të ajrit, ndërsa është rrallë i rrezikshëm jashtë, ku distancat mund të mbahen më lehtë dhe grimcat virale hollohen shumë në ajër.
Për këtë arsye, ekspertët rekomandojnë që maskat të përdoren gjithmonë në ambiente të mbyllura, duke ruajtur gjithashtu një distancë sigurie midis 1 dhe 2 metra. Ecja e një personi pa maskë për disa sekonda në një trotuar jo shumë të populluar me njerëz ose përgjatë një shtegu malor, përbën një rrezik jashtëzakonisht të ulët.
Nëse ai person do të ishte ngjitës, nuk do të kishte kohë të lëshonte grimca të mjaftueshme virale për të transmetuar koronavirusin tek të tjerët. Edhe nëse kollitet apo teshtin, rreziku i marrjes së një doze të mjaftueshme të grimcave virale do të mbetet i ulët.
Gjërat ndryshojnë në rast se keni takime të gjata. Një bisedë në rrugë midis dy miqve pa maska, mund të bëhet në disa raste burim i infektimit:koha e ekspozimit ndaj grimcave virale rritet. Në këto raste këshillohet ta mbani maskën, duke mos harruar të mbuloni hundën dhe gojën.
Rreziku i infektimit ndjeshëm kur hahet një vakt jashtë. Rreziku është shumë i lartë në ambiente të mbyllura, ndërsa relativisht më i ulët jashtë. Sidoqoftë, qëndrimi në një tavolinë për një kohë të gjatë me njerëz të tjerë përfshin një farë rreziku, dhe për këtë arsye këshillohet të mbani një distancë të mirë dhe të përdorni maskën në kohën e ndërmjetme, për shembull gjatë pritjes së porosive.
Të martën më 27 prill, Qendrat për Kontrollin dhe Parandalimin e Sëmundjeve në SHBA (CDC), rekomanduan mos-mbajtjen e maskës gjatë kohës që bëni një shëtitje në natyrë, gjatë kohës që dilni për vrap ose me biçikletë me partnerin tuaj. I njëjti rregull zbatohet në rastin e takimeve në ambiente të hapur midis një numri të vogël njerëzish jashtë që janë vaksinuar. Nëse në grup ka edhe të vaksinuar edhe të pa vaksinuar, rekomandohet përdorimi i një maske nga këta të fundit. Por për aktivitetet e brendshme, CDC vazhdon të rekomandojë përdorimin e maskës, si për të vaksinuarit, ashtu edhe për ata që nuk kanë marrë ende vaksinën.
Burimi i lajmit: https://www.ilpost.it/2021/04/28/macherine-obbligo-aperto-revisione/
Përshtatur nga TIRANA TODAY
