Edhe një herë ministri i Jashtëm i Greqisë, Nikos Kotzias, ka sqaruar sot, se çështja çame nuk është fare pjesë e paktit që pritet të finalizohet mes shtetit helen dhe Shqipërisë. Vetëm një dite pasi media greke “Protothema” publikoi pikat e marrëveshjes që janë në paketën e diskutimit, Kotzias i ka dhënë përgjigje sot kritikave të shumta qe erdhën pas deklaratës se bërë nga kjo media se: “Greqia dha Epirin e Veriut për një Çamëri që nuk ekziston”.
Mediat greke, shkruajnë sot se Kotzias ka deklaruar se ky territor nuk i përket Greqisë.
“Është qesharake të besohet se Epiri i Veriut i përket Greqisë. Ne duhet të bashkohemi. A i njohim kufijtë e formuar nga Akti Final i Helsinkit? A e njohim Aktin Final të Parisit të vitit 1926? A i njohim rezultatet e dy Luftërave Botërore? A e njihni Ligjin Ndërkombëtar, ne duam t’i referohemi atij”?- ka thëne ai.
Sipas Kotzias, çështja çame nuk ka asnjë diskutim dhe theksoi se nuk duhet të ketë as pretendime territoriale.
Sipas tij, opozita greke duhet të jetë e arsyeshme, ndërkohë që theksoi se duhet të kihet mirë parasysh se çfarë ndodh kur kërkohet ndryshim kufijsh. Ai kujtoi në këtë rast, variantet më të këqija sipas tij të politikës së jashtme turke, kur qëllimi ishte rishikimi i kufijve, kushtet dhe sjelljet.
“Disa anëtarë të “Demokracisë së Re” bëjnë lojëra, thonë gënjeshtra, sikur ne shkëmbyem Çamërinë me Epirin e Veriut. Duket se e kanë harruar se ajo që ne e quajmë Epiri i Veriut, sot i përket një shteti sovran, të pavarur. Në të kundërt ta thonë hapur që kërkojnë ndryshim të kufijve? Duan që të bëjmë luftë dhe të ndryshojnë kufijtë? Apo vazhdojmë të besojmë akoma në të Drejtën Ndërkombëtare dhe të zbatojmë marrëveshjet ndërkombëtare”, tha prerë Kotzias.
