Sot në mëngjes, Irani kaloi nga retorika kërcënuese në aksion. Sulmoi dy baza amerikane në Irak me raketa balistike. Kjo në përgjigje të vrasjes nga amerikanët të gjeneralit Qasem Soleimani.
Pas këtij sulmi si do të përgjigjet presidenti Trump?
Deri tani, presidenti amerikan ka dy opsione.
E para, të vazhdojë gjuhën e tij kërcënuese dhe ta përshkallëzojë më tej konfliktin. Analistët besojnë se përgjigja e Trump mund të jetë me një forcë ushtarake disproporcionale. Në këtë skenar, duket e pashmangshme që SHBA-ja të sulmojë tokën iraniane. Krenaria e Republikës Islamike mund të diktojë një lëvizje drejt një lufte totale.
“Nëse Irani bën diçka që s’duhet ta bëjë, do të vuajë rëndë pasojat”, ka thënë presidenti Trump në mbledhjen me Këshillin e Sigurisë më martën. Në këto kushte, lëvizja e ardhshme e SHBA-së mund të përcaktojë fatin e shumë gjërave, kryesores nëse do kemi luftë totale ose jo, gjithçka varet nga lëvizja e radhës së SHBA-së.
Skenari i dytë
Trump mund të pranojë “lojën” e Iranit si reagim proporcional ndaj vdekjes së gjeneralit Soleimani dhe të kontrollojë zemërimin e ushtrisë amerikane. Trump mund të justifikohet me faktin që mund të kishte viktima më shumë dhe se sulmi mund të ndodhte në tokën amerikane.
Por, mesa e njohim presidentin Trump, ai nuk është nga ata presidentë që kthen faqen tjetër kur e godasin. Mantra e tij është kur të sulmojnë, sulmo më fortë – një filozofi që qëndron dhe pas urdhrit për vrasjen e Soleimanit.
Pushim?
Skenari i fundit është një pushim. Instinkti i presidentit të SHBA-së për të tërhequr trupat amerikane mund të jetë më i fortë. Ky instinkt mund të prevalojë kur mendojmë faturën financiare që i shtohet.
“Nuk duam të qëndrojmë aty përgjithmonë. Duhet të largohemi. Nuk dua të jemi atje (Irak) të jem i sinqertë”, mësohet të ketë thënë presidenti Trump gjatë mbledhjes dhe diskutimit për ngjarjen.
Mbase pauza mund t’i japë kohë presidentit Trump të mendohet.
Burimi CNN, përgatiti: Tirana Today
