Festivali i 61-të i Këngës në RTSH këtë vit vjen me 26 këngë në konkurrim. E veçanta e këtij edicioni është se votat e publikut zgjedhin këngën përfaqësuese për në Eurovision. Në listën që ka publikuar RTSH në rrjetet sociale, 16 janë artistë të cilët kanë performuar edhe më parë në festival dhe 10 të tjerë janë artistë të rinj dhe grupe alternative. Këtë vit do të jepen 3 çmime të para: vendi i parë, vendi i dytë dhe vendi i tretë; 1 çmim për artistët e rinj dhe grupet alternative dhe 1 çmim për karrierë.
“Por ndryshe nga vitet e kaluar, Festivali i 61-të i Këngës në RTSH vjen me një risi lidhur me këngën që do të përfaqësojë Shqipërinë në Eurovision, fituesi i së cilës do të zgjidhet me votat e publikut me anë të SMS-ve. Çmimi për 3 vendet e para, çmimi për artistët e rinj dhe grupet alternative si dhe çmimi për karrierën do të jepen pas një vlerësimi nga juria”, thuhet në njoftimin rreth festivalit të këtij viti.
Eurovision Song Contest 2023 do të zhvillohet në Liverpool Arena pranë lumit Mersey, të shtunën më 13 maj me gjysmëfinale të martën më 9 dhe të enjten më 11 maj.
Grupi Kalush ishte fitues i Eurovision 2022, por për shkak të situatës në Ukrainë, festivali i vitit të ardhshëm nuk mund të mbahet atje.
