Kryeministri Edi Rama është takuar me operatorët turistik, për të diskutuar mbi zhvillimin e turizmit në Dibër. Ai e nisi fjalën e tij me batuta për diellin e shiun, duke thënë se në këtë periudhë është e nevojshme që të ketë reshje shiu, në mënyrë që Shqipëria mos të importojë energjinë elektrike, për të mos rritur çmimin e energjisë.
“Nëse nuk kemi shi, kemi atë hallin e madh të çmimit të energjisë elektrike, pasi detyrohemi të dalim në import dhe aty tregu ka ik fare, është çmendur komplet. Ndërkohë që ne duam ta mbrojmë me çdo kusht çmimin për familjarët, dhe për këtë shtresë sipërmarrësish të vegjël që falë mbështetjes që marrin nga qeveria e kësaj mbrojtje, mund të operojnë normalisht”, tha Rama.
Ndërkohë që ka apeluar për kursimin e energjisë elektrike duke bërë batuta. “Duhet patjetër që secili t’i fikë ato drita, jo si Kapllani, që i kishte lënë të gjitha dritat hap. I kemi lënë për ty tha. Po të kishte çmimin real, Kapllani do kishte mbyllur dhe perdet për mua, se do i dukej dhe drita e diellit sikur po e paguante vetë”, u shpreh më tej ai.
