Juristi Ylli Manjani është i mendimit se populli nuk dëshiron hapjen e dosjeve. “Po të dojë populli nuk ka bir politike, se s’po ta them atë fjalën tjetër, që mos t’i hapi ato dosje”, u shpreh Manjani.
Të pyetur nga “Barometri” në “Euronews Albania”, 79.7% e shqiptarëve mendojnë se dosjet duhet të ishin hapur.
Në këndvështrimin e juristit, kjo është një “tallje” dhe vonesa për hapjen e dosjeve është bërë pikërisht prej indiferentizmit të popullit.
Juristi Ylli Manjani thotë se njerëzit e thjeshtë nuk e kuptojnë rëndësinë e hapjes së dosjeve. “Kam njohur nja dy spiunë 1200 lekësh që bënin namin duke sharë spiunët. Spiunllëku përdoret me qëllimin për të ndikuar te ky lloj perceptimi i njerëzve që duket sikur janë në konsensus.
Nëse i çon një personi dhe i thua; dëgjo se gjyshi jot nuk ka qenë ai që mendoje, kthehen tek e kuqja, për mos hapjen. Kjo ka të bëjë me një menefregizëm kombëtar që lidhet me bashkëjetesën, me të keqen, me lloj-lloj fenomenesh dhe s’e kemi seriozisht”, tha Manjani.
Kuvendi miratoi me 94 vota pro dhe 1 abstenim propozimin e Partisë Socialiste për shfuqizimet e komisioneve “Bezhani” e “Mezini”, duke i dhënë të drejtë Autoritetit të Dosjeve të rivlerësojë figurën e zyrtarëve të pajisur me certifikatë pastërtie. Projektligji erdhi pas kërkesës së Autoritetit, pasi doli një dosje me një spiun të Sigurimit me iniciale I.M që dyshohet se është ish-Presidenti Ilir Meta. Gjithashtu u miratuan edhe amendamentet e propozuara bashkërisht nga PD dhe PS që çdo kush mund të kërkojë dosjen e tij, por duhet ta argumentoj pse e kërkon dhe nëse të dhënat do të dalin në publik e të keqpërdoren, do të mbajë përgjegjësi.
