Dje hakerat iranianë publikuan të gjitha të dhënat personale të kreut të qeverisë. Në këtë dokument janë të dhënat e 394 udhëtimeve të kryeministrit, shumica e të cilave me avionë, por në disa raste ka dalë me makinë nga pikat kufitare me Greqinë apo Maqedoninë e Veriut. Nga skeda e sistemit TIMS që rrjeti i hakerave iranianë ka publikuar, thuhet se Rama ka bërë 15 fluturime jashtë Shqipërisë dhe vetëm 2 prej tyre janë me avion të zakonshëm.
Në lidhje me këtë cështje, një reagim ka ardhur nga kreu i qeverisë Edi Rama. Ai komentoi nga Dibra, të dhënat ku u bënë publike të gjitha hyrjet dhe daljet nga Shqipëria që nga viti 2004 e deri në 2022.
Rama i është përgjigjur akuzave të Sali Berishës se ka shpenzuar 19 milionë euro me 127 udhëtime charter.
Ai tha se një udhëtim i tij i ka kushtuar taksapaguesve shqiptarë 650 mijë lekë të vjetra, ndërsa një udhëtim i Berishës 2 milionë e 500 të vjetra. Rama tha se udhëtimi i Berishës ka kushtuar katër herë më shumë se udhëtimi tij.
“Sot kushtet në miniera janë shumë të mira. Pagat për minatorët janë të larta. Kjo s’bën lajm. Me siguri e keni dëgjuar që unë kam një taksi që fluturon dhe që ju kushton shqiptarëve miliona euro.
Do ta dëgjoni këtë përditë nga hienat nga mëngjesi deri në të gdhirë që kanë vetëm këtë punë. Kthehemi te taksia ime, është e vërtetë që prej 2020 kemi bërë marrëveshje me Air Albania për të pasur avion për udhëtimet e punës. Udhëtimet private i bëj me shpenzimet e mia”, tha Rama.
