Kreu i sindikatës së pedagogëve, Sandër Kovaçi, paralajmëroi sot se mund të ketë përshkallëzim të protestës së pedagogëve. Ai nuk përjashtoi mundësinë për grevë urie, nëse nuk ka përgjigje nga qeveria. Të hënën në orën 11:00, pedagogët do të mbajnë protestë kombëtare para korpusit universitar. Sandër Kovaçi tha se nuk do të përdorin grevën, por mund të jetë një opsion për të ushtruar presionin e duhur mbi autoritetet për të reaguar dhe ta kuptojnë rëndësinë e këtij bojkoti.
“Të hënën protesta kombëtare para korpusit universitar, ora 11:00. Greva e urisë është kërkese e disa sindikalistëve, unë personalisht nuk e kam shprehur këtë dëshirë. Por mund të shkojmë deri në këtë fazë nëse nuk ka përgjigje nga qeveria.
Duke qenë në këto kushte kur nuk ka pasur reagim deri tani, erdhëm në fazën e një bojkoti të deritanishëm, dhe tani i kemi dërguar kërkesë qeverisë, dhe të krijojë urën e komunikimit. Nuk duam të përdorim variantin e fundit, atë të grevës, por mund të përdoret për të ushtruar presionin e duhur mbi autoritetet për të reaguar në mënyrë konstruktive dhe ta kuptojnë rëndësinë e këtij bojkoti”, tha Kovaçi.
